Source: Sun Online
މަޖީދީމަގު އަރަބިއްޔާ ސްކޫލް ކައިރީގައި ދެ ސައިކަލެއް ޖެހި މިއަދު ހެނދުނު ހިނގި އެކްސިޑެންޓެއްގައި އަނިޔާވި ދެ މީހުންނަށް އައިޖީއެމްއެޗް އިމަޖެންސީ ރޫމްގައި ފަރުވާ ދެމުން އެބަދެ އެވެ.
ފުލުހުންގެ މީޑިއާ އޮފިޝަލަކު ވިދާޅުވީ މިއަދު ހެނދުނު 10:50 ހާކަންހާއިރު އެ އެކްސިޑެންޓް ހިނގީ ދެ ސައިކަލެއް ޖެހިގެން ކަމަށާއި ނަމަވެސް އަދި އިތުރު ތަފްސީލެއް ދެވެން ނެތް ކަމަށެވެ.
އަނިޔާވި ދެ ސައިކަލުގައި ތިބި ދެ މީހުންނަށް ވެސް މިހާރު އަންނަނީ އައިޖީއެމްއެޗްގެ އިމަޖެންސީ ރޫމްގައި ފަރުވާދެމުން ކަމަށް އައިޖީއެމްއެޗުން ބުންޏެވެ. ނަމަވެސް އެ ދެމީހުންގެ ހާލު މާ ސީރިއަސް ނޫން ކަމަށް ވެސް އައިޖީއެމްއެޗުން ބުންޏެވެ. އެހެންނަމަވެސް އެ މީހުންނަށް ލިބިފައިވާ އަނިޔާތަކުގެ ތަފްސީލެއް އަދި ވަނީ ލިބޭ ގޮތް ނުވެފަ އެވެ.
ސަން އޮންލައިންގެ ނޫސްވެރިން އެ ސަރަހައްދަށް ދިޔައިރު އެކްސިޑެންޓް ވި އެއް ސައިކަލް އޮތީ މަޖީދީމަގު ލެކިއުޓް ކުރިމަތީގަ އެވެ. އަދި ލެކިއުޓް ފިހާރައިގެ ބިއްލޫރި ގަނޑު ކޮންމެ ވެސް ވަރަކަށް ވަނީ ގޭނިފަ އެވެ.
އަދި އަރަބިއްޔާ ސްކޫލް ކުރިމަތީގައި އޮންނަ ޕާކިން ޒޯނުގައި ޕާކް ކޮށްފައި ހުރި ދެ ސައިކަލެއް ވެސް ވަނީ ވެއްޓިފަ އެވެ. އެހެންނަމަ ވެސް އެ ދެ ސައިކަލަށް މާ ބޮޑެތި ގެއްލުން ތަކެއް ވެފައެއް ނެތެވެ. އަދި އެ އެކްސިޑެންޓްގައި އަނިޔާވި މީހެއްގެ ގައިން ފައިބައިފައި ހުރި ލޭ ކޮންމެ ވެސް ވަރަކަށް މަގުމަތިން ފެންނަން ހުއްޓެވެ.
1 comments:
seriously
Post a Comment